Kryeministri Edi Rama nuk lë rast pa marrë meritat, edhe kur ato burojnë nga institucione krejt të pandikueshme prej tij. Kështu ka ndodhur edhe sot, teksa kreu i ekzekutivit tonë i ka bërë jehonë dhënies së vizës së parë amerikane me vlefshmëri 10-vjeçare një qytetareje shqiptare.
Në fakt, kjo arritje duket një pikë ujë në oqean, po të kemi parasysh se janë larguar nga Shquipëria thuajse gjysmë milioni qytetarë nën qeverisjen e tij. Rama e konsideron këtë lajm të bukur në 100-vjetorin e marrëdhënieve midis SHBA dhe Shqipërisë, besim te kjo e fundit:
“LAJM I BUKUR në 100-vjetorin e marrëdhënieve midis Shteteve të Bashkuara dhe Shqipërisë.
Rritet me 10 vjet vlefshmëria e vizës amerikane të qytetarëve shqiptarë, si shprehje kuptimplotë e rritjes së shumëfishtë të bashkëpunimit pas firmosjes së Deklaratës së Partneritetit Strategjik gjatë mandatit tonë të parë qeverisës, si edhe rritjes së vazhdueshme të besimit e respektit ndërkombëtar tek Shqipëria, falë reformave shtetndërtuese e rezultateve domethënëse në një rrugë ndryshimi që vazhdon.
Aplikantja e parë që mori sot vizën e parë amerikane me vlefshmëri 10 vjet”.