Karabinierët në qytetin Torino të Italisë kanë zbuluar një skemë mashtrimi, që thuhet se është hartuar nga tre shqiptarë, me anë të së cilës janë “vjedhur” mbi 1 milionë euro nga sistemi shëndetësor në vend.
la Repubblica raporton se në sajë të këtij mekanizimi kanë marrë shërbim shëndetësor falas të paktën 150 shqiptarë, kryesisht të diagnostikuar me kancer.
Tashmë, personat që bënë skemën e mashtrimit dhe 150 shqiptarët e tjerë që janë nën hetim për mashtrim. Sipas asaj që shkruajnë mediat, shumë prej tyre ishin futur në Itali me qëllimin e vetëm për t’u kuruar.
Nga hetimet e kryera, rezulton se ishin tre personat që e krijuan mekanizmin, dy shtetase shqiptare që punonin si ndërmjetësues kulturore në qendra e Informacionit mbi Shëndetin e Emigranëve në Torino dhe djali i njërës prej tyre. Ditën e sotme gjykata atyre u ka caktuar edhe masat e sigurisë, njëra është në arrest shtëpie dhe tjetra me detyrimin paraqitjeje, kurse djali është pushuar nga puna.
Por si funksiononte skema në fjalë?
Tre shqiptarët kishin shfrytëzuar rregullin e Nenit 35 të aktit të konsoliduar të imigracionit i cili lejon qytetarët që nuk janë në gjendje të mirë shëndetësore që të marrin kujdes shëndetësor në rast të pamundësisë ekonomike. Nëse i sëmuri i përmbush kriteret, atij i caktohet një kod identifikimi (Stp – i huaji i pranishëm përkohësisht) dhe ka qasje në trajtim në objektet publike.
Falë këtij rregulli, dy gratë u kërkonin shqiptarëve që vinin në Itali për t’u kuruar një datë të rreme hyrjeje në vend, prej më shumë se tre muajsh, si të parregullt. Po ashtu, atyre u kërkohej që t’i raportonin mjetet e identifikimit si të humbura për të shmangur gjetjen nga ana e autoriteteve të datës reale.
Dhe, në fund bëhej deklarimi i rremë i gjendjes ekonomike që lejonte futjen në sistem. Djali i një prej shqiptareve të përfshira, futej në bazën e të dhënave të Agjencisë së të Ardhurave dhe ishte përgjegjës për kryerjen e kontrolleve të pasurive tek përfituesit.
Ky sistem, sipas raportimeve, ka vijuar për muaj të tërë ndërsa hetimet janë kryer mes shtatorit 2019 dhe tetorit 2020.