Kryetari i Partisë Demokratike, Lulzim Basha, në një konferencë për shtyp, ditën e sotme nga selia e PD, akuzoi qeverinë në lidhje me menaxhimin e pandemisë.
Basha tha se pacientët me COVID-19 nuk kanë ku të përplasen, teksa solli rastin e babait të një gazetari, i cili kishte pritur 6 ditë me simptoma para se t’i bënin tamponin. Më tej Basha tha se në momentin që ai kishte shkuar në spital 75% të mushkërive i kishte të dëmtuara.
“Unë kam marrë shumë mesazhe. Pacientët e sëmurë me COVID tani nuk kanë ku të përplasen. Sot në mëngjes e vetmja përgjigje për këtë krizë ishte një tjetër paradë e kryeministrit në një pavijon. Informacionet e fundjavës kanë treguar për të sëmurë me COVID që nuk iu është përgjigjur urgjenca dhe kur është përgjigjur i kanë drejtuar në spitale pa asnjë mbrojtje nga COVID. Jam personalisht në dijeni të rasteve me COVID të refuzuar nga sistemi shëndetësor.
Nëse plani ynë me 5 pika do ishte vënë në veprim 4 javë më parë do kishim funksionalë kapacitetet të vërteta dhe do kishim mundësi që mjekësia shqiptare të përballonin dhe fluksin e të sëmurëve të tjerë. Numri i testimeve më i ulëti në Evropë.
Pacientëve u duhet të presin shumë ditë për të bërë tamponin. Babai i një kolegut tuaj ka pritur 6 ditë me simptoma për të bërë tamponin. Kur ka shkuar në spital ka pasur 75 % të pulmoneve të prekur.”, deklaroi Basha.
Sipas Bashës, shumica dërrmuese e qytetarëve nuk mund ta përballojnë koston e paketës së trajtimit me paratë e tyre.
“Shumica dërrmuese e qytetarëve tanë e kanë të pamundur të paguajnë çmimin minimal. 600 mijë lekë në muaj është minimumi i shpenzimeve për një të sëmurë me Covid-19”.
Kryedemokrati ripërsërit apelin për rritje të testimeve dhe rimbursim të ilaçeve për të prekurit me koronavirus.
“Ka kaluar numri i 300 pacientëve në ditë, numri i testimeve mbetet më i ulëti në Europë. Të çohet numri i testimeve në 2000 më ditë, ky është hapi i parë. I dyti të rimbursohet paketa e ilaçeve, mobilizim total i sistemit përmes kapaciteteve për t’u përballur në çdo nivel dhe bonusi 1000 euro për mjek, 500 euro për çdo infermier”.
