Arma sekrete e Ukrainës/ Kush është “Fantazma e Kievit”, piloti që po tmerron rusët

186
0

Piloti tashmë ka marrë nofkën “Fantazma e Kievit”, por deri më tani nuk ka ndonjë konfirmim zyrtar për identitetin e tij. Ndërkohë janë publikuar fotografitë e aeroplanit që fluturon mbi qytetet ukrainase, dhe po shkatërron aeroplanët e armikut.

Heroi i Ukrainës tani është një “legjendë urbane”, pasi ka pak pilotë të aeroplanëve luftarak që kanë arritur të shkatërrojnë një numër kaq të madh të fluturakeve të armikut.

Megjithatë, për “Fantazmën e Kievit” që fluturon me MiG-29 po flitet shumë, ai të enjten rrëzoi gjashtë aeroplanë rusë – duke u bërë “asi fluturues” i shekullit XXI.

“Asi fluturues” konsiderohen pilotët që kanë rrëzuar pesë apo më shumë aeroplanë të armikut gjatë luftimeve – që është një mision tejet i vështirë.

“Fantazma e Kievit” deri më tani ka rrëzuar dy aeroplanë Su-35, një Su-27, një MiG-29 dhe dy Su-25.

Rreth orës 4:20 të mëngjesit të enjtes në pjesën qendrore të Kievit janë parë copat e aeroplanëve nëpër lagje të ndryshme, e Ministria ukrainase e Mbrojtjes ka konfirmuar se janë shkatërruar fluturaket ruse.

Dikush ka publikuar një video të “Fantazmës së Kievit” dhe shkruan se dëshiron që kjo legjendë të jetë e vërtetë.

“Ju lutem, lëreni ‘Fantazmën e Kievit’ të jetë i vërtetë”, shkruan një përdorues i rrjeteve sociale.

Një tjetër përdorues kërkon nga mediat që të konfirmojnë vërtetësinë ose falsitetin e legjendës së “Fantazmës së Kievit”.

“I lutem mediave kryesore ukrainase që të vërtetojnë nëse ‘Fantazma e Kievit’ ekziston vërtet dhe nëse është i vërtetë, sot një pilot hero ukrainas shkatërroi i vetëm 6 avionë ushtarakë rusë”, shkruan një tjetër komentues.