Qeveria hungareze u ofron çifteve të martuara një hua prej rreth 30.000 eurosh, të cilat ata do t’i përfitojnë vetëm nëse bëjnë tre fëmijë.
Budapest – Paratë janë në dispozicion përmes një skeme që nisi në fillim të korrikut. Për më tepër, kredia mund të shpenzohet në çdo gjë që çifti dëshiron dhe pa interes.
Pse kjo nismë e tillë e qeverisë hungareze?
Ashtu si shumë vende të tjera anëtare të BE-së, vendi po vuan nga një mungesë punëtorësh, ku ata po largohen nga vendi në kërkim të pagave më të larta.
Kryeministri Viktor Orban dhe partia e tij e krahut të djathtë Fidesz, duan të inkurajojnë rritjen e popullsisë nëpërmjet familjeve dhe jo emigracionit masiv.
“Nuk kemi nevojë për numra, por për fëmijët hungarezë”, – u shpreh kryeministri i vendit: “Ne duhet të kuptojmë se popujt europianë kanë ardhur në një udhëkryq historik”.
“Ata që vendosen në favor të emigracionit dhe emigrantëve janë në fakt duke krijuar vende me popullsi të përzier. Traditat historike të këtyre vendeve po përfundojnë dhe një botë e re po shpaloset”, – deklaroi kryeministri Orban.
Teksa norma mesatare e lindshmërisë në BE është 1.59, Hungaria ka mbetur me 1.49 fëmijë për çift, – sipas Eurostat-it.
Kredia përbën një pjesë të ‘Planit të Veprimit për Mbrojtjen e Familjes së Orbanit’, një politikë me shtatë pika, e cila kushton 4.8% të GDP-së dhe përbëhet nga programe për të mbështetur familjet e për të inkurajuar lindjet.
Pika të tjera në plan përfshijnë një program kredie për të mbështetur blerjen e një shtëpie, subvencionet për makina për familjet e mëdha dhe një përjashtim të përjetshëm nga tatimi mbi të ardhurat personale për gratë që kanë lindur të paktën katër fëmijë.
