44 lekë për një vezë pularie, një rritje e frikshme për një produkt jetik që deri dy javë më parë tregtohej me gjysmën e çmimit.
Në supermarketet e Tiranës veza masive kushton sot 21 lekë, ndërsa ajo e paketuar e cilësisë së parë kushton 30 deri 44 lekë.
Pensionistët dhe familjet e varfra thonë se për ta veza është kthyer në një ushqim luksi.
Rritja e çmimit të vezës në tregun e hapur përkon me ngordhjen masive të mbi 800 mijë pulave në qarkun e Durrësit si pasojë e infektimit nga gripi i shpendëve.
Hasan Stafa, kreu i grupeve të kontrollit thotë se çmimi i vezës është shtrenjtuar 7 herë në 13 ditë si pasojë e falimentimit të dy stabilimenteve në Durrës që zënë 26% të prodhimit të vezëve në rang vendi.
Eksperti apelon që të mos frekuentohen tregjet informale si dhe çdo produkt i pulës të gatuhet me temperaturë mbi 75 gradë.
