Mbyllja e kufijve mes shteteve dhe mos lejimi i udhëtimeve është shndërruar tashmë që prej muajit mars në një realitet të hidhur për shkak të COVID-19. Por edhe pse Shqipëria është në listën e shteteve që nuk mund të udhëtojnë në vendet e BE, kategori të caktuara mund të udhëtojnë. Në një intervistë për “Vizion Plus” zv.ministri i Jashtëm Agron Tare shpjegon të gjitha procedurat që duhet të ndjekin qytetarët që klasifikohen në kategorimet që mund të udhëtojnë.
Nëse udhëtohet për qëllime mjekësore duhet që nga spitali të ketë një kërkesë nga mjeku që ky pacient këtë shërbim mund ta marri vetëm këtu, ose është në ndjekje të kurave. Në rastin e biznesit, psh. është një kontratë e rëndësishme që kërkon prezencën fizike. Qytetarët e kanë shumë të thjeshtë. Në vendin që do të shkojnë, psh një qytetar që do të shkojë në Gjermani duhet të kontaktojë me ambasadën gjermane. Në ambasadë bën aplikimin për udhëtim dhe jep motivin dhe ambasada i filtron dhe i vlerëson nëse janë aryse të justifikueshme ose jo. Edhe për ne që kemi pasaporta diplomatike, nëse nuk udhëtojmë për motive shtetërore. Pra edhe me pasaportat diplomatike duhet të justifikosh edhe shërbimin, pse po shkon.
Por pavarësisht kësaj procedure dhe mirëkuptimit të shumë shteteve, ka pasur dhe raste refuzimi.
Kemi pasur raste fatkeqësisht me sëmundje, që nuk janë lejuar. Kjo sepse çdo shtet ka mënyrën e tij të vlerësimit.
E në fund Agron Tare ka dhe një apel për të gjithë qytetarët
Mos merrni asnjëherë udhëtimin pa kontaktuar ambasadat e vendeve ku do të shkoni, merrni një informacion. Pa marrë informacion nga ambasada mos udhëtoni se do të gjeni surpriza. Edhe nëse ju lejon polici në Rinas do ju bllokojë polici në destinacion dhe do ktheheni prapë pas. Nuk duhet të merrni asnjë udhëtim pa kontaktuar me ambasadat.