Ministrja e Financave dhe Ekonomisë, Anila Denaj ka njoftuar ditën e sotme se nga data 1 Prill do të aplikohet rritja e pagave.
Sipas Denaj nga ky vendim do të përfitojnë mbi 65 mijë punonjës me një kosto vjetore në buxhetin e shtetit prej 3 miliardë lekë.
Denaj tha se ky është një tjetër premtim i mbajtur i qeverisë shqiptare.
Kategoritë që përfitojnë:
- 36 mijë mësues të Arsimit Parashkollor, Arsimit Bazë, Arsimit të Mesëm të Përgjithshëm dhe atij Profesional do përfitojnë rritje të pagës prej 7 %
- 4,650 mjekë dhe 13,765 infermierë dhe staf shëndetësor, një rritje prej 7 %
- 6,800 ushtarakë të cilët përfitojnë një rritje mesatare të pagës mujore në masën 7 %
- 3,560 punonjës të sistemit penitenciar(policia e burgjeve) të cilët përfitojnë një rritje mesatare të pagës mujore me 7%
- 308 punonjës të përfaqësive diplomatike jashtë vendit të cilët përfitojnë një rritje të diferencuar të pagës mujore që shkon nga 7-20%;
