Duket se qeveria shqiptare ka vendosur që e diela e parë e çdo muaji të jetë një ditë pa makina në vendin tonë.
Kështu ka bërë me dije kryeministri Edi Rama përmes një video-postimi në Facebook, duke thënë se kjo futet në fuqi nga 3 prilli.
Rama: Nga data 3 prill, e diela e parë e çdo muaji do të jetë si fillim DITË PA MAKINA në qytetet kryesore të çdo qarku. Nëse s’e fikim dot automjetin gjatë gjithë kohës, të paktën ta bëjmë ditëve të pushimit dhe të përdorim biçikletën a ecjen në këmbë. Fillojmë mënjëherë në koordinim me bashkitë këtë plan kombëtar për kursim, për mjedisin dhe për shëndetin e të gjithëve.
Ndërkohë, përmes një komunikimi publik ministrja e Turizmit dhe Mjedisit Mirela Kumbaro njoftoi hartimin e një plani kombëtar të ditëve pa makina, që do të shtrihet në qytetet kryesore të çdo qarku.
Kumbaro tha se në kushtet e një krize energjitike dhe karburanti, por edhe si përgjigje ndaj angazhimeve mjedisore të Shqipërisë, është një nismë e parë për të reduktuar lëvizjen me makina në ditët e pushimit.
Kumbaro: Angazhim ky që do të vazhdojë pa rreshtur, por nga ana tjetër sa i takon krizës së karburanteve kërkon mirëkuptimin e tonë në reduktimin e lëvizjeve me automjete sa më shumë të kemi mundësi. Dhe nëse s’mund ta shmangim ndezjen e makinës çdo ditë, të paktën ta fillojmë nga ditët e pushimit. Prandaj e nisim planin e Ditës pa Makina nga e diela e parë e çdo muaji, duke filluar prej datës 3 prill.
