Heqja e kufizimeve për udhëtimet drejt vendeve të Bashkimit Europian, për kryetarin e Shoqatës së Tur-Operatorëve, Besnik Vathi është një lajm i mirë, por që duhet parë me rezerva. Sipas tij, lënia në dorë e vendeve anëtare që të vendosin mbi masat specifike mund të kushtëzojë udhëtimet.
“Efekti praktik i këtij vendim sot është zero. Nuk ka asnjë mundësi që ne sot të presim biletën dhe të udhëtojmë drejt Gjermanisë, Francës apo një shteti tjetër, pa u shoqëruar nga vendimet e çdo vendi”.
Për Vathin, përpos vendimit të vendeve anëtare të Bashkimit Evropian, autoritet në vend duhet të lehtësojnë më tej masat shtrënguese si pasojë e pandemisë Covid-19 me qëllim rigjallërimin e turizmit.
“Çdo ditë e mbajtur mbyllur është në dëm të ekonomisë së vendit”.
Vendet anëtare të Bashkimit Evropian kanë rënë dakord të mërkurën për të hequr kufizimet e udhëtimit për udhëtarët nga tetë shtete, përfshirë këtu Shqipërinë, Serbinë dhe Maqedoninë e Veriut. Megjithatë, pavarësisht vendimit në parim, vendet anëtare të bashkimit Europian do vendosin për masat specifike për udhëtimet.