BE jep alarmin: Ose merrni masa ndaj virusit ose do mbyllim serish kufijtë

752
0

Komisioni Evropian dëshiron që vendet dhe qytetarët të zgjohen nga vala e dytë e pandemisë – duke paralajmëruar se përndryshe, BE do të duhet të përdorë përsëri bllokime të rrepta.

Rastet e koronavirusit janë në rritje në shumë vende të BE-së, me disa norma infektimesh edhe më të larta se në mars.

“Mund të jetë shansi ynë i fundit për të parandaluar një përsëritje të pranverës së kaluar”, paralajmëroi Komisionerja e Shëndetësisë, Stella Kyriakides në një konferencë shtypi të enjten.

Masat nuk kanë qenë mjaft efektive dhe as nuk janë zbatuar siç duhet, tha ajo.

“Ne duhet të parandalojmë një situatë kur qeveritë mendojnë se nuk kanë zgjidhje tjetër veçse të imponojnë bllokime të përgjithësuara”, tha Kyriakides. “Kjo do të jetë e dëmshme për shëndetin tonë mendor, e dëmshme për ekonomitë tona, e dëmshme për mirëqenien dhe arsimimin e fëmijëve tanë, e dëmshme për punën dhe jetën tonë të përditshme”.