Dentistja Olesia Duka, e arrestuar këtë të diel nën akuzën e mashtrimit me qëllim përvetësimin e parave ndaj një biznesmeni, do të qëndrojë pas hekurave në vijim të hetimeve.
Gjykata e Durrësit ka caktuar sot masën e sigurisë “arrest me burg” për të, pas denoncimit të bërë nga pronari i një pike këmbimi valutor në Durrës, Idlir Hoxha, se i ka marrë 900 mijë euro.
Duke folur sot në gjykatë, 38-vjeçarja ka mohuar akuzat ndaj saj, duke e cilësuar gjithçka si një skenar të përgatitur për ti shkatërruar imazhin publik dhe karrierën.
Megjithatë lidhur me njohjen me Idlir Hoxhën dhe biznesmenët e tjerë nga Tirana dhe Durrësi, të cilët kanë bërë denoncim ndaj saj për mashtrim, deklaroi se një pjesë prej tyre i njihte, për shkak të marrëdhënieve të biznesit.
Në vijim tha se ka tre klinika dentare, “Kisha nisur dhe një projekt bamirësie me fondacionin “Dhuro buzëqeshje falas” për të rregulluar dhëmbët e fëmijëve të policëve të vrarë. Kontratat e huamarrjes i kam lidhur para noterit në lidhje me personat e mësipërm që kam marrëdhënie biznesi”.
Me biznesmenin Hoxha, shtoi se është njohur në nëntor të vitit 2016 dhe se ka pasur marrëdhënie biznesi, duke pretenduar se rreth shtatë muaj më vonë vëllai i tij e ka kërcënuar duke i thënë se u kishte borxh 843 mijë euro.
“Më kërcënuan dhe më detyruan të merrja borxh te disa persona të tjerë, e madje edhe kredi bankare për t’ua shlyer”, deklaroi Duka.
Megjithatë dentistja pretendon se kontratat e huamarrjes i ka nënshkruar tek noteri.
Dentisja e njohur si vajzë kopertinash, e pranishme në revista, por edhe në emisione televizive, akuzohet se goditjen më të rëndë ia ka dhënë biznesmenit nga Durrësi.
Që nga njohja mes tyre në nëntor të vitit 2016, dentistja i ka marrë 900 mijë euro, duke mos ia kthyer më.
Prokuroria e Durrësit tha ditën e diel, se nga hetimet e kryera, dyshohet se 38-vjeçarja përmes gënjeshtrës dhe mashtrimit i ka marrë shuma të mëdha financiare biznesmenit Hoxha, që nga njohja mes tyre dhe vazhdon të mos ja kthejë.
Për rrjedhojë Gjykata ka vendosur sekuestro preventive për pesë pasuri të 38-vjeçares dhe familjarëve të tij me një vlerë mbi 300 mijë euro dhe më konkretisht bëhet fjalë për apartamente.
Rezulton se Duka mashtronte persona të ndryshëm, duke iu marrë shuma të mëdha parash të cilat mendohen rreth 2 milionë euro, duke iu thënë se kishte disa klinika dentare dhe se i duheshin paratë për të blerë aparatura. Por pasi merrte paratë ajo nuk i kthente më.
