Shefja e Shërbimit Epidemiologjik në ISHP Silva Bino tha se Komiteti i ekspertëve është mbledhur të premten dhe shumë shpejt do të komunikojë vendimin për aplikimin e dozës së tretë të vaksinës. Bino tha se kjo dozë do të nisë të aplikohet për personat mbi 60 vjeç dhe ata me imunitet të ulët.
“Komiteti është mbledhur ditëen e premte dhe do të aplikohet edhe doza e tretë bazale për personat me imunitet të ulët, ata që kanë bërë transpalante, ne kemi bërë dhe studime këtu.
Personat mbi 60 vjeç do të vaksinohen me dozën booster. Personat që kanë dëmtime të imunitetit do të kenë një përqasje tjetër”, tha Bino.
Ndërkohë, Bino tha se po shikohet edhe përdorimi i vaksinës tek personat mbi 16 vjeç, tashmë i miratuar në SHBA për vaksinën Pfizer.
“Personat mbi 16 vjeç do të vaksinohen. Nuk më takon të them vendimet e komitetit. Nuk po themi që do të vaksinohen me detyrim. Janë problem që do diskutohen. Nuk merren vendimet menjëherë. Nën 18 vjeç janë fëmijë dhe përgjigjet prindi dhe lidhet me dakordësinë e prindit”, tha Bino.
