Programi “Dua të të bëj të lumtur” solli mbrëmjen e djeshme historinë e një nëne, e cila kishte kaluar një kalvar vuajtjesh gjatë gjithë jetës së saj. Ishte pikërisht historia e Antonetës, nënës së tre vajzave, e cila kur kishte qenë e re ishte martuar me mblesëri me dikë që e kishte takuar vetëm një herë. Vështirësitë ekonomike e kishin shtyrë bashkëshortin e saj që të emigronte në Greqi dhe pikërisht në këtë moment kishin nisur problemet në familjen e tyre. Ai nuk ishte kujdesur për Antonetën dhe vajzat, madje shpeshherë i dhunonte ato. Kjo si pasojë e varfërisë ekstreme dhe problemeve që bashkëshorti i saj kishte me alkoolin.
E rrethuar nga varfëria dhe dhuna e vazhdueshme, Antoneta kishte vendosur që të divorcohej. Pas divorcit ajo nuk kishte pasur mundësinë që të kujdesej për vajzat, prandaj dy prej tyre i kishte dërguar në jetimore. Pas katër vitesh i rimori vajzat, por sërish ishte në gjendje të vështirë ekonomike, madje sanitarja e Top Channel kishte tentuar edhe vetëvrasjen.
“Një ditë isha në ashensor me Xhemin. Isha e sëmurë dhe me temperaturë. Xhemi më tha: Pse nuk vizitohesh? Nuk kam i thashë, s’e përballoj dot”, rrëfeu Antoneta.
Në vijim Arbana tha: “Sapo doli nga ashensori, Xhemi më telefonoi mua dhe më tha: Ç`mund të bëjmë për këtë zonjë? Unë me thënë të drejtën nuk të njihja.” Ndërkohë me ndërmjetësimin e emisionit, u bë e mundur që Antonetës t’i ndryshonte jeta. Drejtori i një kompanie pijesh energjike, i premtoi asaj se pas një muaji do të ketë në duar çelësin e një shtëpie të re.
