Tragjedi në Maqedoni/ Mbi 50 të vdekur dhe më shumë se 80 të plagosur nga zjarri në diskotekën

Mbi 50 të vdekur dhe mbi 80 të plagosur nga zjarri në diskotekën “Puls”

Koçan, Maqedonia e Veriut – Një zjarr shkatërrues ka shpërthyer në orët e para të mëngjesit në diskotekën “Puls” në Koçan, duke shkaktuar të paktën 50 viktima dhe mbi 80 të plagosur.

Sipas informacioneve fillestare, zjarri dyshohet të jetë shkaktuar nga përdorimi i mjeteve piroteknike gjatë një koncerti të grupit DNA, ku po merrnin pjesë rreth 1500 persona. Paniku i shkaktuar pas shpërthimit të flakëve bëri që shumë persona të ngecnin pranë daljeve emergjente.

Evakuimi dhe të plagosurit

Më shumë se 80 të lënduar janë transportuar në klinikat e Shkupit, Spitalin Kirurgjik të Qytetit “Shën Naum Ohri” dhe spitalin “8 Shtatori”. Ndërkohë, disa të plagosur janë dërguar në spitalet e Koçanit dhe Shtipit për trajtim të menjëhershëm.

Reagimi i autoriteteve

Në Koçan ndodhen ministri i Punëve të Brendshme, Pançe Toshkovski, drejtori i Byrosë për Siguri Publike, Aleksandar Janev dhe kryeministri Hristijan Mickoski, të cilët po ndjekin situatën nga afër.

Ndërkohë, Prokuroria Themelore Publike e Koçanit ka nisur hetimet për zbardhjen e shkaqeve të tragjedisë. Në vendngjarje ndodhen prokurorë nga Prokuroria Publike e Maqedonisë së Veriut, të cilët po mbledhin prova dhe dëshmi për të përcaktuar përgjegjësitë.

Hetimet në vijim

Shërbimet e emergjencës dhe Drejtoria për Mbrojtje dhe Shpëtim po vijojnë operacionet e shpëtimit dhe mbikëqyrjen e situatës. Autoritetet kanë premtuar hetim të plotë dhe ndëshkim për përgjegjësit e kësaj tragjedie të rëndë.

Please follow and like us:

0

20