Televizionet plehra dhe programet tuaja të pista, fajtorët kryesorë të degradimit të vendit

96
0

“Big Brother VIP Albania” është kthyer në qendër diskutimi: mashtrime, dhunë fizike, dhunë psikologjike, fjalor vulgar, presion, bullizëm. Fatkeqësisht, këto dy javë ndjekësir e formatit kanë marrë çdo ndjesi veç atyre pozitiveve. 

Kjo ka vënë në pikëpyetje edhe misionin e televizioneve dhe kodin moral e etik të reality-show-ve. Shumë është thënë e vazhdon të thuhet, por zhvillimet e fundit na kujtuan letrën që një mësues italian i quajtur Marco Galice u shkroi pak vite më parë prezantuesve të reality-show-ve në vendin fqinj. Dhe që na duket shumë aktuale dhe e përshtatshme edhe për vendin tonë. 

Ai u kërkonte prezantuesve në letrën në fjalë që të mos shkatërrojnë më rininë e adoleshentët. Ai gjithashtu ngrite shqetësimin se këto programe janë false dhe një mashtrim që shkatërrojnë sistemin mendorë të brezave të rinj. Ai shkonte larg madje duke shkruar se zhdukja mediatike dhe shkatërrimi profesional i tyre është ndëshkimi i duhur për ta. 

Letra

“JU AKUZOJ! 

Barbara D’Urso, Maria De Filippi, Alfonso Signorini, Alessia Marcuzzi dhe gjithë hordhinë tuaj në llogoret e këtij ferri. 

Unë ju akuzoj se jeni ndër fajtorët kryesorë të kalbëzimit kulturor të vendit tonë, të barbarizmit të tij shoqëror, të korrupsionit dhe gërryerjes të tij morale, shkatërrimit mendor të brezave të rinj, varfërimit etik të tyre dhe shtrembërimit të edukimit të fëmijëve tanë. 

Ju, me televizionet tuaja plehra, me programet tuaja të pista, shfaqjet tuaja artificiale, false, mashtruese, pseudo, keni kontribuar në vetën e parë dhe pa skrupuj në kalbëzimin e Mijëvjeçarit të tretë, i cili këtë herë, për fat të keq, nuk mbart ndonjë vlerë, por vetëm zeron (asgjënë) kozmike. 

Ju jeni bashkëpunëtorë dhe promovues të vetëdijshëm të atij procesi pervers mediatik që ka ngulitur bindjen për një vetë-realizim të bazuar ekskluzivisht në pamjen e jashtme, në shfaqjen e famës, suksesit dhe bukurisë, në kërkimin e vazhdueshëm të duartrokitjeve, në miratimin e publik, për ndërtimin e asaj që të tjerët duan dhe jo të asaj që jemi. 

Kjo është bota juaj, kjo është ajo që villni nga studiot tuaja televizive për vite me radhë. 

Ju promovuat vrazhdësinë, injorancën, varfërinë morale dhe kulturore si modele të marrëdhënieve dhe njohjes shoqërore, sepse programet tuaja janë të mbushura, me sharlatanë, injorantë dhe të paedukuar. 

U keni dhënë famë dhe i keni shndërruar në modele për tu imituar personazhe që nuk kanë vlera, nuk kanë kulturë, nuk kanë asnjë busull morale. 

Ju përfaqësoni poshtërimin e të diplomuarve, turpërimin e atyre që studiojnë, të atyre që investojnë kohë dhe burime në kulturë, të atyre që janë të zhgënjyer dhe më në fund braktisin Italinë, sepse vëmendja është për aktorët e programeve tuaja. 

Unë flas si një mësues, i cili sheh me zemërim si nxënësit e tij imitojnë arrogancën, gënjeshtrën, pamjen e jashtme, provokimin, vrazhdësisë që përhapin personazhet në televizionin tuaj. Flas si ai që sheh të njëjtën dinamikë në një realitet të trishtë që përsëritet në klasat e mia, me nxënës që besojnë se kjo dhe vetëm kjo është mënyra për tu lidhur me bashkëmoshatarët e tyre dhe për tu pranuar prej tyre dhe për t’u vlerësuar prej tyre. 

Si mësues i cili sheh hutim, frikë, izolim në sytë e atyre fëmijëve që nuk përshtaten, që nuk i dorëzohen më joshjes së kësaj bote të tmerrshme, por që për këtë shpërblehen me veçim dhe tallje. 

Kam parë në vitet e mia si mësimdhënës së pari me hutim, pastaj me shqetësim dhe tani me terror qindra nxënës që sillen si kopje të personazheve të turpshëm që mbushin programet tuaja, duke u përpjekur të jenë si ata. Dhe unë jam i neveritur nga vetëkënaqësia që ju kullon në programet tuaja në prani të personazheve të caktuara. 

Unë ju akuzoj, sepse ju jeni personalisht përgjegjës për të gjitha këto. 

Shpresoj për fundin tuaj profesional dhe zhdukjen tuaj mediatike, sepse këto janë ndëshkimet e duhura për dëmet e pariparueshme që i keni shkaktuar vendit.”