Rusia ka përsëritur kërcënimin ndaj NATO-s dhe SHBA-ve se do të sulmojë ndihmat që do i dërgohen Ukrainës.
Zëvendësministri i Jashtëm Sergei Ryabkov tha se Moska ka paralajmëruar SHBA-në se do t’i konsideronte objektiva legjitimë ushtarakë dërgesat amerikane dhe të Perëndimit në Ukranë.
“Rusia e paralajmëroi SHBA-në se dërgimi i armëve në Ukrainë nga një numër vendesh që ajo orkestron nuk është vetëm një veprim i rrezikshëm, por është një veprim që i bën ato autokolona objektiva legjitime”.– deklaroi ai.
Ryabkov gjithashtu denoncoi sanksionet e SHBA-së kundër Moskës si një “përpjekje të paprecedentë për t’i dhënë një goditje serioze sektorëve të ndryshëm të ekonomisë ruse”, por vuri në dukje se Moska do të veprojë në një mënyrë të matur për të shmangur dëmtimin e vetvetes.
Më herët NATO i bëri thirrje urgjente Rusisë për të mos sulmuar dërgesat e Perëndimit, teksa kërcënoi se nëse kjo do të ndodhte, pasojat për Rusinë do ishin të rënda.
Kjo është hera e parë që NATO kërcënon Rusinë me konfrontim, pasi deri më tani si përgjigje ishin përdorur vetëm sanksionet.
