Orët kalojnë dhe fatkeqësisht numri i viktimave nga tërmeti në Turqi dhe Siri vijon të rritet. Së fundmi numri i personave që kanë humbur jetën pas tërmeteve që goditën Turqinë dhe Sirinë të hënën është rritur në të paktën 21,051, sipas autoriteteve.
Në Turqi, numri i të vdekurve është rritur në të paktën 17,674 dhe numri i të plagosurve është 72,879, tha të enjten nënpresidenti Fuat Oktay.
Në Siri, të paktën 3,377 njerëz u vranë, përfshirë 2,030 në zonat e kontrolluara nga rebelët në veriperëndim, sipas grupit të mbrojtjes civile të Helmetave të Bardha – dhe 1,347 vdekje në pjesët e kontrolluara nga qeveria të Sirisë, sipas medias shtetërore siriane.
Numri i personave të lënduar në Siri në të gjitha territoret e prekura u rrit në 5245—2295 në zonën e kontrolluar nga qeveria dhe 2950 në zonën e kontrolluar nga rebelët.
Tërmeti i së hënës në Turqi dhe Siri shkaktoi shkatërrime në të gjithë rajonin, duke vrarë mijëra dhe duke shkatërruar ndërtesa dhe lagje në dhjetëra qytete.
Më herët, Organizata Botërore e Shëndetësisë (OBSH) thotë se organizatat humanitare tani kanë sfidën për të siguruar që ata që i mbijetuan tërmeteve të vazhdojnë të mbijetojnë . Ata thanë se tani janë me mijëra njerëz që mbijetojnë “jashtë” në të ftohtë dhe në kushte të tmerrshme, pa ujë, karburant apo energji elektrike.
Ndërkohë njerëzit e prekur nga tërmeti nuk kanë nguruar të shprehin zemëratën e tyre lidhur me mënyrën se si kjo situatë po menaxhohet nga ana e qeverisë.
Ata janë shprehur se nuk kanë marrë ndihmat e nevojshme dhe se në shumë vende të prekura nga tërmeti kanë munguar edhe shërbimet e urgjencës.
Presidenti turk Rexhep Tajip Erdogan pranoi dje se qeveria kishte hasur disa probleme , por tha se situata tani ishte “nën kontroll”.
Përpjekjet për ndihma në Siri janë komplikuar nga konflikti i viteve, por karvani i parë i ndihmës për Sirinë veriperëndimore të kontrolluar nga opozita thuhet se kaloi në territor nga Turqia. Dorëzimi i ndihmave jetëshpëtuese ishte ndërprerë për katër ditë për shkak të dëmtimit të rrugëve dhe çështjeve logjistike