Kryeministri Edi Rama ka njoftuar se qeveria po mbyll një paketë ndihme për 1 milionë qytetarë për shkak të situatës së krijuar nga kriza energjetike dhe inflacioni i luftës. Sipas Ramës, “Pakoja e Madhe” do të shpërndahet e gjitha në ditët e para të Janarit.
Në këtë paketë do të ndihmojnë kryesisht pensionistët dhe familjet në ndihmë ekonomike, paraplegjikët, tetraplegjikët, personat me aftësi të kufizuara etj.
Postimi i Kryeministrit Edi Rama
Qeveria po mbyll Pakon e Madhe në mbështetje të 1 milionë individëve, për të lehtësuar ndjeshëm daljen e familjeve shqiptare nga ky dimër i ngarkuar, duke zeruar efektin e inflacionit të luftës mbi konsumin bazë për pensionistët, familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, po edhe për punonjësit e shtetit – duke dhënë më shumë për ata që fitojnë më pak, por pa lënë askënd pa mbështetje.
Pakoja e Madhe, e cila parashihet mbi 8 miliardë lekë në dorë për të gjithë individët e përfshirë, do të mbyllet brenda ditës së sotme dhe do të shpërndahet e gjitha në ditët e para të janarit.
Kjo është qeveria e shumicës, jo e disave dhe faktet e shifrat thonë se volumi i mbështetjes financiare të atyre që fitojnë më pak apo të shtresave në nevojë, në vitet e qeverisjes sonë (pa llogaritur fondet masive të Rindërtimit pas tërmetit apo të Luftës me pandeminë) është disafish më i lartë se sa në tërë qeveritë e mëparshme të marra së bashku.