Nënë e bir kanë vjedhur shuma të majme parash si dhe bizhuteri floriri në një banesë, të cilat iu janë sekuestruar ditën e sotme nga policia.
Ndërsa vjedhjet e tyre ishin shtuar, grabitja e fundit që dyshja kishte bërë ishte në shtëpinë e një ish këshilltareje në Kryeministri.
Gazetrja Klodina Lala bën me dije se ajo banesa ishte e Alda Klosit, ish-shefes së kabinetit të ish-zv. kryeministrit Arben Ahmetaj.
Banesa ndodhet në Rrugën e Kosovarëve, ndërsa mendohet se vjedhja në fjalë ka ndodhur në datën 15 dhjetor të 2022-shit. Ishte pikërisht Klosi që ka bërë denoncimin në polici më 15 dhjetor, ndërkohë banesa ku është kryer vjedhja ishte marrë nga ajo me qira.
Tashmë pas hekurave ndodhen Rozeta Dobi dhe djali i saj, Havier Dobi. Kujtojmë se në banesën e këtyre të dyve u sekuestruan dje shuma të mëdha parash, ndërsa sot mbi 400 mijë euro, që ishin fshehur në tubin e aspirimit. Mësohet se pastruesja ka mbi 5 denoncime për raste të mëparshme ku thuhet se ka vjedhur në banesat ku ka punuar më herët.
