Kryetarja e Lëvizjes Socialiste për Integrim, Monika Kryemadhi tha para ndërtesës së Parlamentit se zgjidhja e vetme e opozitës është rrëzimi i Edi Ramës dhe që nga nesër e tutje sipas saj, mediat do të kenë lajme pafund. Kryemadhi tha se opozitës deri më tani i është vënë damka si “zjarrfikëse” e protestave, por kjo nuk do të ndodhë më sipas saj.
Kryemadhi: Shumë shpejt do të mblidhemi. Këtu nuk është çështje bojkoti, se nuk ke çfarë bojkoton më. Këtu është çështja për të larguar një orë e më parë njeriun që ka marrë peng shqiptarët. Zt. Basha e tha shumë mirë, opozita do të bashkohet për të ecur përpara drejt zgjidhjes së problemeve. Sot kemi një Parlament të marrë peng. Nuk është gjë e re për ne, por për të gjithë ata që nuk kanë pasur sy dhe vesh për ta parë. Nuk ka më nevojë për protesta masive. Ke me qindra e mijëra studentë që bojkotojnë mësimin, ke qindra e mijëra prindër që i mbështesin ata, ke minatorët, ke naftëtarë, ke biznesin e vogël që është gati për ngritur. Deri më tani, opozita ka marrë damkën si zjarrfikës, por tashmë nuk do të fikë zjarrin e protestës. Do të vazhdojë dhe do të vihet në krye të të gjitha protestave. Nuk ka asnjë zgjidhje tjetër. Çdo njeri që i jep oksigjen një qeverie të kapur me në krye një kryeministri të çmendur psiqik dhe hajdut klinik është tradhti kombëtare. U kërkojmë ju që të hapnin ekranet. Mos bini pre e blerjes apo joshjes së Edi Ramës me oligarkët për tv që janë sado pak. Lajme pa fund do të keni që nga nesër e tutje.