Këtë të mërkurë në emisionin “Aldo Morning Show” në Tv Klan, ka qenë i ftuar oficeri i Policisë Rrugore, Neri Hunda, ku ka folur më tepër rreth rregullave të qarkullimit rrugor.
Kjo temë erdhi si pasojë e aksidentit në Durrës, ku një polic u aksidentua në vijat e bardha nga një automjet.
Efektivi i policisë tha në studion lëvizëse se për shkak të këtij aksidenti, do të ketë një rritje të masave për këmbësorët ose drejtuesit e makinave.
“Atëherë, Drejtoria Vendore e Tiranës, Komisariati i Policisë Rrugore, ka marrë një nismë për të rritur pak masat për këmbësorët, për drejtuesit, për mjetet që nuk respektojnë shpejtësinë në qendrat e banuara. Është një masë me vlerë 10 mijë deri në 40 mijë lekë të reja, për ata që nuk rregullojnë shpejtësinë. Mendoj që duhet rritur disi, edhe masa për mosrespektimin e vijave të bardha të këmbësorëve është një masë e vogël dhe mendoj që duhet rritur e ajo. Mendoj që shoferët janë ndërgjegjësuar disi, 2 vjeçarët e fundit shohim që ka një përmirësim, por ka elementë që vazhdojnë akoma të shkelin kodin rrugor” – thotë efektivi i policisë, Neri Hunda.
Gjatë emisionit, Aldo, drejtuesi i programit, e pyet policin edhe për disa rregulla të tjera që qytetarët duhet të kenë parasysh, pasi mund të gjobiten.
- Rënia e borisë
Polici: Ka sinjalistikë që ndalohet rënia e borisë. Ajo është një masë e vogël, deri në 2 mijë lekë. Mendoj që duhet rritur edhe ajo. Hyn tek pjesa që duhet rritur vlera.
- Makinat me xhama të zinj
Polici: Xhamat hyjnë tek pjesa e luksit, kështu që mendoj… shkelësit që janë të përsëritur janë gjobitur vazhdimisht nga ana jonë. Mendoj që duhet rritur edhe vlera e saj.
- Manovrimet, majtas dhe djathtas
Polici: Kjo hyn tek shkelja e mosrregullimit, është neni 139 dhe është një vlerë 20 mijë deri në 40 mijë lekë të reja.
- Telefoni dhe rripi i sigurimit
Polici: Telefoni është i vazhdueshëm për ne. Është shkelja… 87% të aksidenteve nga telefoni janë. Raste të përsëritura, nëse ke 2 herë shkelje brenda vitit, rasti i tretë, konstatimin e tretë dhe ke automatikisht pezullim me leje drejtimi. 3 muaj.
Në fund, oficeri i Policisë Rrugore shpjegon që shkeljet në kodin rrugor mbeten në historikun e drejtuesit të mjetit dhe nëse personi kryen një shkelje tjetër, policia e ka të lehtë ta kuptojë sesa gabime ka bërë drejtuesi brenda 1 viti.
