Njihemi me parashikimin e motit për 24 orët në vijim në Shqipëri dhe rajon.
Gjatë natës dhe paradites së nesërme, moti do të jetë kryesisht i kthjellët në pjesën më të madhe të territorit. Vranësira të lehta dhe kalimtare do të shfaqen në skajin verior dhe në zonat lindore.
Temperatura do të pësojë një tjetër rritje. Në mëngjes, termometri do të shënojë nga 9 në 11°C në zonat malore, dhe nga 14 në 17°C në ultësirë dhe përgjatë bregdetit. Në mesditë, temperaturat do të arrijnë deri në 35°C, veçanërisht në zonat qëndrore dhe jugperëndimore.
Në pjesën e dytë të ditës, pritet shtim i vranësirave, sidomos për shkak të temperaturave të larta. Si pasojë, do të kemi rrebeshe afatshkurtra në lindje, juglindje dhe pjesërisht në jug. Rreshje më të pakta do të prekin edhe gjysmën lindore të qarqeve të Tiranës dhe Elbasanit, si dhe pjesë të Kukësit dhe Dibrës.
Ndërkohë, bregdeti do të mbetet kryesisht me kthjellime dhe vranësira kalimtare.
Era do të jetë e lehtë, me drejtim perëndimor dhe jugperëndimor gjatë gjithë ditës.
Sa i përket ditëve në vijim: moti mbetet i kthjellët të premten dhe të shtunën. Të dielën pasdite pritet shtim gradual i vranësirave, të cilat do të bëhen më të dukshme në mbrëmje dhe në fillim të javës së ardhshme. Temperaturat do të qëndrojnë të larta deri të hënën, ndërsa të martën pritet një freskim i lehtë i motit për shkak të ardhjes së masave ajrore më të freskëta nga veriperëndimi.
Në rajon dhe Ballkan, pritet e njëjta tablo: kthjellime dhe vranësira pasdite, të cilat do të sjellin rrebeshe lokale në zonat lindore dhe juglindore. Në brigjet perëndimore, moti mbetet më i qëndrueshëm dhe me temperatura 30–33°C.
Në Europë, gjysma perëndimore do të përballet me vranësira dhe reshje të shkurtra, veçanërisht në Alpe, veriperëndim dhe ishujt britanikë. Ndërsa Europa Lindore dhe Jugore, përfshirë Mesdheun, do të gëzojnë mot të kthjellët dhe të nxehtë. Temperaturat maksimale do të arrijnë deri në 38–39°C në gadishullin Iberik, Greqi dhe Siçili.