Këtë fillim muaji në studio e “Aldo Morning Show” në Tv Klan ishte e ftuar meterologia Lajda Porja. Ajo bëri parashikimin për ditët e muajit Shkurt. Sipas saj Shkurti do të jetë më i ngrohtë se Janari që lamë pas, megjithatë temperaturat e ftohta do të jenë prezente në të gjithë territorin vendit.
Në të gjitha qytetet temperaturat do të jenë -4 deri në -5 gradë Celsius, me përjashtim të qyteteve përgjatë vijës bregdetare. Temperaturat në këto zona do të jenë 1 ose 2 gradë Celsius.
“Muaji i fundit i dimrit, po na ikën. Me aq sa kemi përjetuar ditët e fundit, sot dhe nesër do të ketë kthjellime, vranësira dhe herë pas here ndonjë shi lokal. Parashikohet që nga mesi i Shkurtit, data 14-15 dhe nga java tjetër do të kemi një përmirësim të situatës. Që nesër të parashikohet që të ketë një rënie të lehtë të temperaturave, të martën dhe në vazhdim. Do të kemi temperatura me vlera negative në të gjithë territorin. -4 dhe -5 në të gjitha qytetet e territorit të Shqipërisë. Presim që Tirana t’i afrohet 0 apo -1 gradë Celsius. Do të jetë 1 ose 2 Gradë Celsius vetëm në vijnë bregdetare, kurse të gjitha vendet e territorit i afrohen vlerave me minus. Janë disa ditë të ftohta, por nuk do të jetë java më e ftohtë e dimrit nëse bëjmë krahasimin me mesin e Janarit që u shënua -10 gradë. Presim një minimum që do të jetë në skajin veri dhe veri-lindor. Në luginën e Valbonës ose në Shishtavecin e Kukësit temperaturat mund të shkojnë deri në -8 gradë Celsius.”
Lajda Porja tha për publikun se mesi i muajit Shkurt do të sjellë një rritje të temperaturave. Ditët e kthjellëta do të na shoqërojnë gjatë gjysmës së dytë të muajit. Lagështira në ajër do të jetë shumë e paktë, ndërkohë që do të mungojnë reshjet e shiut apo të borës. Sipas meterologes edhe Marsi nuk do të jetë i ngrohtë, pasi do të vijojë të jetë në nuancat e dimrit.
“Shkurti në pjesën e dytë të tij normalizon temperaturat. Do të jetë më i ngrohtë se sa Janari dhe më i thatë. Ka sinjale që për 14 apo 15 ditë nuk presim fare reshje. Mund të jetë një episod reshjesh që mund të zgjasë shumë pak në pjesën e dytë të Shkurtit dhe ajo që duhet të theksohet është që nuk duhet të heqim xhupat sepse do të marrim pak edhe nga Marsi. Mund të them që edhe muaji Mars do të vijojë në nuancat e dimrit.”
