Nga 1 tetori, do të hyjë në fuqi marrëveshja me Zvicrën, për njohjen e kontributeve të sigurimeve shoqërore të qytetarëve shqiptarë për efekt pensioni. Lajmi është konfirmuar nga kryeministri Edi Rama, me anë të një postimi në rrjetet sociale.
“Në datën 1 tetor hyn në fuqi Marrëveshja për Sigurimeve Shoqërore mes Shqipërisë 🇦🇱 dhe Zvicrës. Kjo marrëveshje do t’u ofrojë qytetarëve të të dy vendeve të drejtën të gëzojnë përfitimet e plota të kontributeve të tyre”, shkruan Rama.
Një marrëveshje e tillë është nënshkruar edhe me Italinë, por nuk ka hyrë ende në fuqi. Për këtë, kreu i qeverisë nuk jep datë, por njofton se do të ndodh së shpejti.
“Së shpejti edhe ratifikimi i marrëveshjes me Italinë”, përfundoi kreu i qeverisë.
Zbatimi i marrëveshjes do të ketë efekt financiar për shtetasit shqiptarë në momentin kur ata të kenë mbushur moshën për pension, kur lind dhe e drejta për përfitime nga skema e sigurimeve shoqërore. Janë afërsisht 2,000 shtetas shqiptarë të cilët jetojnë e punojnë në Zvicër, pa përfshirë shtetasit shqiptarë me shtetësi të dyfishtë.
