Kapen dy pensionistë italianë, shikoni si i mashtronin shqiptarët

1122
0

Dy shtetas italianë u arrestuan në qytetin e Elbasanit në përpjekje për t’i shitur një argjendarie këtë sasi ari të rremë që shihni në foto.

Fortunato Maddaloni dhe Rikardi Xhenario (Gennario) përkatësisht të moshës 67 dhe 76 vjeç, kishin nisur aktivitetin e tyre të mashtrimit  në qershor në Malin e Zi dhe më pas, gjatë muajve të verës edhe në Tiranë, ku sipas policisë kanë shitur ar të rremë me vlerë 200 mijë Euro.

Dy shtetasit italianë kishin mbërritur disa kohë më parë në Shqipëri dhe mashtronin argjendaritë duke iu dhënë si provë fillimisht ar të pastër.

Pasi lidhnin marrëveshjen, ata i shisnin atyre arin në formën e kokrrizave të përzier me metale të tjera.

Gjatë operacionit, Policia gjeti 3 kilogramë ar të dyshuar si i rremë, 160 gramë ar i pastër, 4 aparate celularë, 1500 Euro dhe 150 franga zvicerane.

Njoftimi i policise

DVP Elbasan / Vijon puna për parandalimin, evidentimin dhe goditjen e paligjshmërive në fushën e krimit ekonomik.

Finalizohet nga Seksioni për Hetimin e Krimit Ekonomik dhe Financiar në DVP Elbasan, operacioni policor i koduar “Fake Gold”.

Kontrabanduan dhe shitën nëpërmjet mashtrimit, ar të rremë me vlerë 200 000 euro, arrestohen në flagrancë në një argjendari, gjatë tentativës për të shitur sërish, 2 shtetas italianë.

Sekuestrohen një sasi ari, 4 aparate celuare dhe shuma parash të monedhave të ndryshme.

Në vijim të punës për parandalimin, evidentimin dhe goditjen e veprimtarisë kriminale të kontrabandës me mallra të licencuara dhe të deklarimit të rremë të shtetasve, nëpërmjet mashtrimit, në lidhje me natyrën, llojin dhe cilësinë e tyre, si dhe bazuar në informacionet e marra në rrugë operative, specialistët e Seksionit për Hetimin e Krimit Ekonomik dhe Financiar në DVP Elbasan organizuan dhe finalizuan me sukses operacionin policor të koduar “Fake Gold”, si rezultat i të cilit u arrestuan në flagrancë shtetasit:

-F. M., 67 vjeç, banues në Napoli, Itali dhe R. G., 76 vjeç, banues në Milano, Itali.

Nga veprimet hetimore rezultoi se këta shtetas në bashkëpunim me njëri-tjetrin, kanë shitur ar (metal) në formë kokrrizash, me vlerë 200 000 euro, në Tiranë dhe Podgoricë, gjatë periudhës qershor-gusht 2022. Materiali që këta shtetas kanë shitur ka rezultuar më pas, i përzier me metale të tjera.

Si rezultat i operacionit policor të koduar “Fake Gold”, 2 shtetasit janë kapur dhe arrestuar në flagrancë në qytetin e Elbasanit, gjatë tentativës për të shitur arin e rremë në një argjendari, ku fillimisht kishin mashtruar duke ofruar një sasi të vogël ari të pastër.

Në cilësinë e provës materiale janë sekuestruar 3 kilogramë ar i dyshuar si i rremë, 160 gramë ar i pastër, 4 aparate celulare, 1500 euro dhe 150 franga zviceriane.

Materialet hetimore i kaluan Prokurorisë së Rrethit Gjyqësor Elbasan, për veprime të mëtejshme procedurale, për veprat penale “Kontrabanda me mallra të lincencuara” dhe “Mashtrimi”.