Që pas publikimit të skandalit me ish-zyrtarin e lartë të FBI-së, sot është shfaqur kryeministri Edi Rama, i cili thotë se ka qenë i sëmurë me grip, ndaj këshillon të gjithë që të bëjnë kujdes.
Hera e fundit që Rama doli në publik ishte 4 ditë më parë, kur mblodhi edhe drejtuesit politikë, ndërsa para gazetarëve mohoi akuzat se ka lidhje me hetimet qe autoritetet amerikane po bejne per McGonigal.
Sot Rama në një videomesazh nga zyra e tij tha se qeveria vazhdon politikat mbështetëse për disa kategori, ndërsa theksoi së shumë shpejt do të bëjnë diçka edhe për ata që paguhen me pagë minimale në sektorin privat.
“Përshëndetje, fillim javë të mbarë, uroj të jeni mirë. Bëni kujdes me këtë flamën gripale që është vërdallë se e hoqa vetë dhe ‘nuk të bën për burrë’, kur thonë tironsit.
Gjithsesi nuk e kam ndalur komunikimin me skuadrën time sidomos me financat për disa politika mbështetëse, duke nisur nga paga minimale, për pagat për ca kategori të veçanta burimesh njerëzore. Mbështetja me strehim e mjekëve, ushtarakeve, policëve që kanë një familje të re.
Natyrisht pakoja tjetër për pensionistët e domosdoshme në pranverë, nga rindarja e taksës së jashtëzakonshme mbi ekspertuesit e mëdhenj të energjisë sic jemi zotuar.
Na vjen mirë që pakoja e madhe ka lehtësuar ndjeshëm 1 mln përfituesit e saj çka vihet re edhe në një rritje të kënaqshme të konsumit. E di që duhet akoma, duke nisur nga ata që punojnë me pagë minimale në sektorin privat, sidomos ata në prodhim, të cilët duhet të paguhen më shumë dhe sa më parë. Së shpejti do ti diskutojmë në qeveri, pastaj do ti bëjmë më dije këto politika të qeverisë që është një qeveri e shumicës dhe jo e disave”, tha Rama.
