Në ditët në vijim qeveria pritet të nënshkruajë Dekretin e ri të Flukseve për vitin 2021, me të cilin pritet të jepen mbi dyfishin e lejeve të punës në krahasim me vitin e kaluar. Nëse do të ndodhte kështu, do të ishte një procedurë e krijuar për të regjistruar shifra të paprecedentë për imigracionin e fuqisë punëtore në Itali.
Sipas asaj që raportohet nga Il Corriere della Sera, duhet të jepen 81,000 hyrje dhe rregullime të reja, kundrejt afro 31,000 që u dhane në gjashtë vitet e fundit. Nisma buron nga një nevojë e rritur nga sipërmarrësit, të cilët vazhdojnë të denoncojnë mungesën e fuqisë punëtore të kualifikuar dhe njerëzve të gatshëm për të kryer detyrat më të rënda.
Një mungesë që po ngadalëson rimëkëmbjen ekonomike. Numri mund të mos jetë ai përfundimtar dhe mund të pësojë ndryshime në rënie për shkak të presionit të brendshëm nga shumica, veçanërisht nga Lega. Megjithatë, sipas WeBuild, udhëheqësit kombëtar të ndërtimit, mungojnë të paktën 100 mijë punonjës për të realizuar planet e PNRR. Për këtë arsye supozohet se 81 mijë vendet mund të jenë realiste.
Sipas projektit që përmban versionet më të fundit të qarkulluara të draftit, 36 mijë hyrje janë menduar për të mbuluar nevojat e punëtorëve vartës. Sektorët që kanë nevojë për numrin më të madh të punonjësve janë ai i transportit rrugor, i ndërtimit dhe i turizmit. 45 mijë të tjera, nga ana tjetër, mund të mbulojnë nevojat për punë sezonale. Duket se po shqyrtohet edhe hipoteza e kalimit të dy dekreteve , të dyja 70/80 mijë pranime secili. Do të ishin një për vitin 2021 dhe një për vitin 2022. Në këtë mënyrë do të mund të plotësoheshin nevojat e botës së biznesit.
