Një shqiptar humbi jetën në Itali si pasojë e një aksidenti rrugor.
Ngjarja ndodhi të enjten mbrëma teksa 67-vjeçari, emri i të cilit nuk është bërë publik, duke ecur në këmbë u përplas nga një makinë.
Aksidenti u shënua në një rrugë provinciale në Valperga. Siç shkruajnë mediat, dëmtimet që ai kishte marrë ishin shumë të mëdha dhe humbi jetën në vendin e ngjarjes.
Të njëjtat burime thonë se shqiptari sapo kishte blerë disa pajisje pune, mes tyre edhe një sharrë elektrike. Me pajisjet e reja ai ishte nisur drejt shtëpisë, ku për arsye që nuk dihen ende u godit nga një makinë Audi Q2 kur po kalonte rrugën.
Policia thotë se nuk ka patur shenja frenimi në rrugë dhe përplasja ka qenë shumë e fuqishme, duke e hedhur 67-vjeçarin të paktën 30 metra larg vendit të ngjarjes.
“E njihja, ishte një klient i rregullt i dyqanit tonë, një njeri shumë i sjellshëm”, tha pronari i dyqanit ku kishte qenë shqiptari pak para aksidentit tragjik.
Në lidhje me ngjarjen policia ka ndaluar një 71-vjeçar që drejtonte makinën. Ai ka dhënë deklaratën në polici dhe më pas është dërguar në spital në gjendje shoku./klan/
