Qeveria e Giorgia Melonit në Itali po ringjall një politikë të kohës së Benito Mussolinit për sjelljen e keqe të studentëve në një përpjekje për të “rikthyer respektin” në klasë dhe shkollat e vendit.
Ligji dragonian i periudhës fashiste të Duçes synon të ndalë sjelljen e keqe të nxënësve, në një kohë kur është rritur ndjeshëm shqetësimi për agresionin ndaj mësuesve në shkollat fillore dhe të mesme.
Masa e kohës së Musolinit mbeti në fuqi deri në mesin e viteve 1970, përpara se të shfuqizohej në shkollat fillore dhe të mesme pas protestave të studentëve. Ajo iu nënshtrua ndryshimeve gjatë viteve përpara se të shfuqizohej përfundimisht në të gjitha shkollat në vitin 2000.
Por, politika e “notave të sjelljes”, e ngjashme me masësn e qeverisë fashiste të Musolinit të miratuar në 1924, është pjesë e një projektligji arsimor të miratuar në parlament të mërkurën me 154 vota pro dhe 97 kundër që u jep shkollave aftësinë për të gjykuar nxënësit bazuar në sjelljen e tyre, shkruan A2.
Studentët që shënojnë pesë ose më pak nga 10 pikë në sjellje do të humbasin vitin dhe duhet ta përsërisin atë edhe nëse pozita e tyre akademike është e mirë. Nxënësve të shkollave të mesme që shënojnë vetëm 6 në rezultatin e sjelljes do t’u kërkohet të bëjnë një test qytetarie. Renditja në bazë të sjelljes së tyre do të ndikojë shumë edhe në pjesëmarrjen në provimet vendimtare përfundimtare, raporton A2.
Po ashtu gjoba nga 500 deri në 10,000 euro do të aplikohen për akte agresioni ose dhunë ndaj stafit të shkollës.
Giuseppe Valditara, ministër i Arsimit në qeverinë Meloni, tha se “reforma e notave të sjelljes rikthen rëndësinë e përgjegjësisë individuale” dhe “centralizon respektin për njerëzit e të mirat publike duke rikthyer në vend autoritetin e mësuesve”.
Sakaq, vetë kryeministrja Meloni tha se ndryshimi do të rikthejë respektin në shkolla. Ligji, i cili u miratua nga ANP, sindikata e drejtuesve të Italisë, u ndikua nga një rritje prej më shumë se 110% e incidenteve të agresionit ndaj stafit mësimdhënës në fillim të vitit krahasuar me 2023. Në shumë raste mësuesit kanë pasur nevojë për trajtim mjekësor pasi janë përleshur me nxënësit për përdorimin e celularëve në klasë, ndërsa në të tjera autorë kanë qenë prindërit e nxënësve.
Antonello Giannelli, president i ANP, tha se masa përbën një hap përpara. “Ne kemi dëgjuar për shumë raste të sjelljes së padisiplinuar dhe të pazakontë. Është e drejtë që studentëve u kërkohet të reflektojnë për përgjegjësitë e tyre si pasojë e veprimeve të tyre”, deklaroi ai, citon A2.
Pavarësisht frymës pozitive që qeveria Meloni dëshiron të përcjellë me këtë masë, Anna Askani, një politikane nga Partia Demokratike e qendrës së majtë, tha se kodi i sjelljes shënon për Italinë “një kthim në një kohë që ne më mirë do donim ta harronim”.
