Juristja dhe moderatorja e njohur Eni Çobani ka folur për herë të parë pas ndarjes nga jeta të gjyqtarit Astrit Kalaja, me të cilin ishte përfshirë në debat publik lidhur me një çështje pronësie që kishte bërë bujë.
Në një intervistë televizive, Çobani sqaroi se e gjithë situata e konfliktit ishte keqkuptuar dhe se qëllimi i saj ka qenë gjithmonë të sqarojë publikun mbi dokumentet dhe të vërtetat ligjore të një dosjeje që kishte nisur që në vitin 1992.
Ajo rrëfeu se në varrimin e gjyqtarit ka përjetuar një moment që e ka tronditur. “Gjëja më e çuditshme që pashë në atë ceremoni ishte prania e disa personave që kanë qenë të përfshirë direkt në konfliktin ligjor. Nuk u besoja syve. Ishin njerëz që kishin firmosur dokumente, që kishin pasur rol në përplasjet gjyqësore, dhe megjithatë ishin aty, në homazhe. Ishte një kontrast i pabesueshëm për mua,” tha Çobani.
Ajo shtoi se e ndjeu të nevojshme të fliste për të mbyllur një herë e mirë keqkuptimet dhe për të sqaruar se asnjëherë nuk ka pasur përplasje personale me gjyqtarin Kalaja, por vetëm një përpjekje për të sqaruar publikisht faktet dhe dokumentet ligjore të çështjes.
“Kam respekt për figurën e gjyqtarit Astrit Kalaja. Ajo që ndodhi ishte pjesë e një procesi ligjor që zgjati me vite, por nuk ka pasur asnjëherë urrejtje apo sulm personal. Kam dashur vetëm të bëj transparencë,” tha Çobani.
Deklarata e saj ka marrë vëmendje të gjerë në rrjete, sidomos për detajin e pazakontë që ajo përmendi nga varrimi, të cilin e cilësoi si “moment që nuk do ta harroj kurrë”.