Mesa duket deti dhe pishinat, do të jenë e vetmja mundësi për t’i shpëtuar temperaturave përvëluese të kësaj fundjave.
Raportohet se vala e të nxehtit afrikan që ka përfshirë Shqipërinë, ka bërë që termometri këtë të shtunë të arrijë vlerën e 36 gradëve.
Shkodra, Tirana, Elbasani, Fieri, Berati dhe Gjirokastra janë qytetet që kanë përjetuar temperaturat më të larta.
Parashikimet flasin që temperaturat të tejkalojnë vlerën e 38 gradëve përgjatë të dielës, duke e bërë dhe ditën më të nxehtë të kësaj vere deri tani.
Krejt ndryshe do të nisë java. Temperaturat pritet të pësojnë rënie të menjëhershme me 8 gradë, si dhe i gjithë vendi të përfshihet nga reshjet e shiut, sipas Klan.
E kjo situatë do të zgjasë vetëm pak ditë, për të rikthyer të nxehtin përvëlues në 26 Korrik.
