“Është e rëndësishme që opozita të trajtojë drejt se si duhet zhvilluar pushteti lokal dhe të ketë figura të qënësishme që më shumë se sa politik të prodhojnë një raport të drejtë me qytetarët.”, kjo është këshilla e aleatit opozitar Fatmir Mediu vetëm 6 muaj para zgjedhjeve lokale. Për tia arritur këtë sipas kreu të republikanëve kërkon organizim më të mirë të së djathtës shqiptare.
“Politikisht pres një riorganizim të së djathtës, jashtë
subjekteve të tjera”. I ftuar në emisionin KafeIN në IN TV, Mediu kërkon
ndryshimin e kodit zgjedhor, e në këtë pikë kreu i republikanëve kërkon
lista të hapura. “Propozimi ynë është për lista të hapura. Parlamenti
shqiptar për një kohë u kthye në Pazar i gjësë së gjallë”, u shpreh
republikani. Nuk munguan as sulmet e forta ndaj kreut të qeverisë.
“Me ndryshimet që bëri në qeveri tregoi se qeveris vetëm Rama
dhe tashmë ka ardhur tek pika, sepse nuk ka se çfarë të japë tjetër
përveçse banalitetit dhe një lloj rrugaçërie që nuk vlen për qeverisës,
të vijë tek pika që të shpërfillë të gjithë politikën shqiptare”, tha
Mediu. Duke folur për karrierën e tij politike, Fatmir Mediu u ndal edhe
në ngjarjet që kanë shënjuar karrierën e tij, tragjedia e Gërdecit.
“Tragjedia që ndodhi është një nga goditjet më të mëdha në jetën
time personale dhe politike dhe një gjë që nuk shkulet nga mendimi im.
Dhe po ti bëjmë analizën sot mendoj se duke u marrë me gjëra të mëdha
një ministër nuk duhet të harrojë gjërat e vogla sepse djalli fshihet në
detaje”.
