Eksperti i sëmundjeve infektive në SHBA, Anthony Fauci, ka deklaruar se vaksina kundër COVID-19 mund të jetë gati në SHBA që në fillim të muajit dhjetor.
Fauci u shpreh se ajo do të provohet që është e sigurt dhe nëse do të japë rezultate, do të fillojë edhe shpërndarja e saj.
Megjithatë, ai sqaroi për televizionin BBC se do të duhen ende disa muaj të tjerë para nisjes së vaksinimit në masë.
“Mendoj se do të mësojmë nëse një vaksinë është e sigurt dhe efikase në fund të nëntorit ose në fillim të dhjetorit. Pyetja është, pasi e kemi një ose më shumë vaksina të sigurta, si do t’i çojmë tek njerëzit që kanë nevojë së më shpejt të jetë e mundur? Sasia e dozave që do të jenë të disponueshme në dhjetor nuk do të jetë e mjaftueshme. Do të kenë prioritet stafi mjekësor, apo ata që gjenden në kategorinë e personave më të rrezikuar. Të tjerë do të duhet të presin disa muaj të tjerë në 2021-shin”, tha Fauci.
