Një ngjarje e pazakontë ka ndodhur sot në Gjirin e Lalzit, ku një struc rreth dy metra i gjatë është parë duke lëvizur i lirë në zonë. Sipas dëshmitarëve, shpendi i veçantë duket se është arratisur nga një fermë apo ndonjë qendër private.
Struci, i cili ka tërhequr vëmendjen e kalimtarëve dhe pushuesve, ka shkaktuar habi dhe kuriozitet të madh. Disa persona madje kanë ndaluar për ta fotografuar ose filmuar. Nuk ka informacione të sakta se nga mund të ketë ardhur, por autoritetet lokale dhe banorët po përpiqen të kontaktojnë pronarin e mundshëm.
Ky është një rast i rrallë për zonën, pasi struci nuk është një shpend vendas dhe zakonisht mbahet në kushte të kontrolluara në ferma apo kopshte zoologjike. Ndërkohë, banorët janë këshilluar të mos afrohen shumë, pasi struçi mund të ndjehet i frikësuar dhe të reagojë papritur.
