Këtë të mërkurë u ratifikua në Senatin e parlamentit italian marrëveshja me Shqipërinë në fushën e sigurimeve shoqërore.
Siç bëri me dije ministri i Shtetit për Marrëdhëniet me Parlamentin, Taulant Balla, i pranishëm gjatë seancës plenare, marrëveshja për pensionet u miratua me të gjitha votat pro të senatorëve.
Nga kjo marrëveshje përfitojnë rreth 500 mijë bashkatdhetarë që jetojnë prej vitesh në Itali.
“Me të gjitha votat “PRO” Senati i Parlamentit Italian ratifikoi finalizimin e marrëveshjes midis Republikës së Shqipërisë dhe Republikës Italiane në fushën e Sigurimeve Shoqërore/Pensionet. Kjo është një ditë shumë e rëndësishme për të gjithë bashkatdhetarët tanë në Itali, por edhe familjarët e tyre kudondodhur, sepse me hyrjen në fuqi të Marrëveshjes të gjithë ata (450.000-500.000 shqiptare) që kanë shumë vite që jetojnë, sakrifikojnë, punojnë dhe kontribuojnë në zhvillimin e ekonomik të Italisë, (nga ’90 e këtej) por edhe të atyre shtetasve italianë që kanë kontribuar e punojnë në Shqipëri, do të kenë më në fund mundësi të gëzojnë dhe përfitojnë sigurimet shoqërore/pensionet”, tha Balla.
Marrëveshja në fjalë hyn në fuqi pasi të firmoset nga Presidenti italian, Sergio Mattarella.
Kujtojmë se marrëveshja u firmos në Romë një 1 vit më parë. Rreth 500 mijë shqiptarë që jetojnë prej vitesh në Itali dhe 2 mijë italianë që ushtrojnë aktivitetin e tyre në vendin tonë do të përfitojnë nga njohja dhe bashkimi i periudhave të kontributeve shoqërore, duke mos u humbur asnjë vit pune.
Marrëveshja synon të mbulojë pensionet e pleqërisë, atë të invaliditetit e të papunësisë, pa qenë nevoja të aplikohet në vendet e origjinës. Përpara se të hynte në fuqi kjo marrëveshje duhej të kalonte për ratifikim në Kuvendet respektive.
Përveç Italisë, Shqipëria ka nënshkruar marrëveshje në fushën e sigurimeve edhe me Hungarinë, Kanadanë, Turqinë, Belgjikën, Luksemburgun, Gjermaninë, Austrinë, Kroacinë, Kosovën, Maqedoninë e Veriut dhe Republikën Çeke.
Sakaq në proces marrëveshjet janë duke u negociuar edhe me Holandën, Francën, Greqinë dhe Rumaninë.
