Dy tërmete me magnitudë 7.7 dhe 6.4 në Mianmar, lëkundje që janë ndjerë deri në Tajlandë e Kinë. Lëkundjet e para, siç shkruajnë mediat e huaja u ndjenë në veriperëndim të qytetit të Sagaing me një thellësi prej 10 km, rreth orës 06:20 të kësaj të Premte.
Ka raportime për dëme në infrastrukurë në Mianmar, por edhe në Bangkok (kryeqytetin e Tajlandës). Teksa banorët janë panikosur, shumë prej tyre kanë mbetur të lënduar. Kryeministrja tajlandeze Paetongtarn Shinawatra anulloi një vizitë zyrtare menjëherë pas kësaj situate emergjente.
Tërmetet e mëparshme në Mianmar
Tërmetet janë relativisht të zakonshme në Mianmar, ku 6 tërmete të forta me magnitudë 7 (të shkallës Rihter) e goditën midis viteve 1930 dhe 1956.
Një tërmet i fuqishëm me magnitudë 6.8 në kryeqytetin e lashtë Bagan në Mianmarin qendror vrau 3 persona në vitin 2016, duke rrëzuar edhe muret e tempullit historik.
