Dha dorëheqjen që t’i përkushtohej familjes, Ardi Veliu merr postin e rëndësishëm në ministri

91
0

Ardi Veliu, i cili dha dorëheqjen si Drejtor i Policisë së Shtetit për t’iu përkushtuar familjes do të marrë një post të rëndësishëm në MIE.

Veliu është emëruar si zëvendës ministër i Ministrisë së Infrastrukturës dhe Energjitikës.

Veliu vetëm pak kohë më parë u dorëhoq nga drejtimi i Policisë së Shtetit, ku përmes një letre drejtuar kryeministrit Edi Rama dhe ministrit të Brendshëm Bledi Çuçi argumentonte vendimin e tij. Në vendin e tij u emërua Gledis Nano.

Letra e kërkesës për dorëheqje

“Për mua ka qenë një nder dhe privilegj t’i shërbej vendit si Drejtues i Policisë së Shtetit për katër vitet e fundit në një punë sfiduese e impenjative të përditshme, shpesh larg familjes e fëmijëve që kanë sakrifikuar bashkë me mua. Jam përpjekur të jap më të mirën time dhe të forcave tona policore duke menaxhuar situata komplekse nga lufta kundër trafiqeve e drogës, krimit të organizuar e atij të rrugës, flukset e emigrantëve apo dhe tubimet shpeshherë të dhunshme.

Por në këto momente kam vendosur të mos kërkoj mandate tjetër dhe t’ju ofroj dorëheqjen time për t’u përkushtuar më shumë familjes dhe fëmijëve që tani janë në një moshë delikate e të cilëve ju kam munguar pafund këto katër vite.

Kjo ka qenë padyshim përvoja më e vyer e jetës sime dhe ju falenderoj për besimin, mbështetjen dhe kurajon e vazhdueshme pa të cilat nuk do kishim arritur të menaxhonim me sukses kaq shumë sfida. Mezi pres të punojmë sërish së bashku në të ardhmen në shërbim të njerëzve tanë.

Me mirënjohjen më të thellë e konsideratat më të larta,

Ardi Veliu”.