Zbulohen të tjera detaje nga protesta e opozitës, e cila është paralajmëruar të mbahet më 16 shkurt.
Deputeti i LSI Endrit Braimllari deklaron se masa e protestuesëve do qëndrojnë pa limit në bulevard. Madje sipas tij, do mbajë të rrethuar kryeministrinë deri në largimin e Edi Ramës nga detyra e kryeministrit.
I ftuar në emisionin “Debati në Channel One” të gazetarit Roland Qafoku bashkë me përfaqësues të PD, deputeti Braimllari tha se janë marrë masa që një pjesë e madhe e protestueseve të mos largohen pas fjalimeve, por të qëndrojnë te kryeministria për shumë ditë deri sa kryeministri të largohet nga detyra.
Po ashtu deputeti ka propozuar Pndeli Majkon si kryeministër tranzitor, që sipas tij mund të garantojë zgjedhje brenda standarteve.
“Vetëm një qeveri tranzitore me një kryeministër tjetër do të jetë kushti që protesta të përfundojë. Nuk bëhet fjalë të ikë Rama dhe të vijë Basha, por të garantohet një proces zgjedhor i drejtë. Në këtë mënyrë një person brenda PS por pa cilësitë e Ramës që ne besojmë, përshembull është Pandeli Majko, i cili mund të garantojë zgjedhje brenda standarteve” tha Braimllari.