Mjekja pediatre, Sonila Brato deklaroi se virusi RSV është i rrezikshëm, sepse prek rrugët respiratore te fëmijët.
Në një intervistë për Euronews Albania, Brato u shpreh se ky virus mund të përhapet nëpërmjet kontaktit, nëpërmjet tështimave, kollitjeve, nga një fëmijë te tjetri.
Sipas saj, më të rrezikuarit janë fëmijët e moshës 0-1 vjeç.
“Në fakt, RSV-ja është një virus i cili ende në vendin tonë nuk është prezent, pavarësisht se në fakt, në shumë vende të Evropës ka ngritur alarmin që po qarkullon dhe shpeshherë reaminacionet e pediatrisë atje janë të ngarkuara dhe të mbipopulluara, por te ne, ende ISHP-ja është në alert, por nuk ka deklaruar raste me virusin RSV. Në fakt, është një virus i rrezikshëm, sepse prek rrugët respiratore, mund të përhapet nëpërmjet kontaktit, nëpërmjet tështimave, kollitjeve, nga një fëmijë te tjetri.
Përgjithësisht, më të riskuara janë moshat 0-1 vjeç dhe realisht në këtë periudhë, kemi parë goxha fëmijë, edhe bebe fare të vogla, dy javëshe apo një muajshe të cilat vijnë te ne. Është një virus që mund të çojë në komplikime, pra, kolla mund të bëhet shumë e vështirë, mund të jetë prezent temperatura, mbase jo në shifra të larta, por mund të shkojë në 38. Vështirësia në frymëmarrje, një mos ngopje me frymë që i bën prindërit të shqetësohen dhe të drejtohen te pediatri. Në këto raste, të paktën për fëmijët e vegjël duhet patur kujdes”, theksoi ajo.
