Një euro këmbehet sot në tregun valutor për 99 lekë. Në raport me fillimin e vitit 2024, kur monedha europiane këmbehej me 103.4 lekë, rënia vlerësohet rreth 4.4 pikë.
Kjo prirje tregon se, për shkak të ofertës së lartë të euros në treg, zhvlerësimi ka qenë i pashmangshëm. Kjo ofertë ka ardhur nga turizmi, remitancat, investimet e huaja dhe burimet informale gjithashtu.
Në shifra, në vitin 2024, ishin 1.4 miliardë euro investime nga jashtë, 1.2 miliardë euro nga bilanci neto i turizmit dhe 900 milionë euro remitanca. Po ashtu, edhe shpenzimet e buxhetit të shtetit ishin 7.2 miliardë euro, të cilat rritën qarkullimin e parasë dhe ndikuan në kërkesën për lekë.
Gjatë ditëve të fundit, monedha europiane preku një rritje të shpejtë, duke u këmbyer me 100 lekë, por po rikthehet sërish në ciklin e lirë.
Nëse prirja vazhdon, euro mund të zhvlerësohet më tej, megjithatë, nëse eksportet dhe kërkesa për investime dhe tregti rriten, ajo mund të stabilizohet e madje të forcohet edhe më tej.
