Shkarkimi i Konit ka shkaktuar mjaft reagime në politikë.
Pas një pause, pas përçarjes me Blushin që çoi në përjashtimin e saj si kryetare e LIBRA-s, ish-deputetja e PS-së Mimoza Hafizi, tashmë pedagoge në Universitetin e Tiranës, është rishfaqur sërish për publikun me një reagim për pezullimin e rektorit Mynyr Koni.
Me anë të një postimi në Facebook, Hafizi ka sulmuar kryeministrin Edi Rama, pasi pretendon se pezullimi i rektorit të Universitetit të Tiranës ka ardhur si shkak i përplasjeve me kryeministrin, i cili e ka paralajmëruar hapur në takimet me studentët.
Ish-deputetja kërkon të dijë arsyet e shkarkimit sepse sipas saj ka kontrolluar dhe nuk ka gjetur asnjë dokument të plotë e të qartë me argumentet e këtij vendimi në Ministrinë e Arsimit.
Reagimi i plotë i Hafizit:
Kryeministri kërcënon prej muajsh rektorin e Universitetit të Tiranës, kurse sot ministrja e arsimit e paska pezulluar. Jam njëra nga pedagoget e këtij universiteti. Kam një histori të gjatë betejash për të mbrojtur vlerat e tij, si brenda mjedisit akademik e shkencor, ashtu edhe në politikë e në parlament.
Po kërkoj në faqen zyrtare të Ministrisë së Arsimit për të gjetur një dokument të plotë e të qartë me arsyet dhe argumentet e këtij vendimi.
Për çfarë shkeljesh bëhet fjalë? Nuk po i gjej askund.
Pedagogët e Universitetit të Tiranës meritojnë ta kenë këtë transparencë. Qeveria është e detyruar ta bëjë. Përndryshe, unë do të jem e para që këto akte do t’i konsideroj si pjesë të planit okult të rilindjes për të përçarë e goditur Universitetin e Tiranës. Plan i përpiluar nëpër rrjeshtat ogurzeza të kapitullit XII të Ligjit aktual për Arsimin e Lartë.
