Emigrantët shqiptarë që kanë vite që punojnë edhe jetojnë në Greqi mund të përfitojnë nënshtetësinë greke. ‘Gazeta Shqiptare’ zbardh sot kategoritë e individëve që kanë të drejtë aplikimi si dhe ata që nuk mund të marrin nënshtetësi. Përkatësisht personat që nuk kanë leje qëndrimi ose kanë një leje qëndrimi të përkohshme nuk kanë të drejtë të aplikojnë për nënshtetësi helene. Gjithashtu, iu humb e drejta e aplikimit për këtë të fundit edhe individëve që kanë marrë dënime me burg që janë më shumë se 6 muaj, për lloje të caktuara krimesh, ose dënime që janë më shumë se 1 vit për krime që janë kryer me dashje.
Aplikimi
Ndërkohë mund të aplikojnë për nënshtetësinë greke personat që kanë mbi 7
vite qëndrimi të përhershëm dhe të ligjshëm në Greqi si dhe ata që kanë
mbi 3 vjet qëndrim të përhershëm dhe të ligjshëm në Greqi me kusht që
të jenë martuar me një nënshtetas/e grek/e dhe të kenë fëmijë me të.
Edhe individët që kanë më shumë se 3 vite qëndrim të përhershëm dhe të
ligjshëm nëse kanë një fëmijë në moshë të mitur që ka nënshtetësi greke
mund të marrin nënshtetësi. Përjashtohen nga aplikimi ata që e kanë
fituar nënshtetësinë, sepse kanë frekuentuar një shkollë greke. Për
nënshtetësinë helene mund të aplikojnë edhe refugjatët apo personat që
janë pranuar si individë pa nënshtetësi nga autoritetet greke, me kusht
që të kenë mbi 3 vite qëndrim të përhershëm në këtë shtet.
Dokumentacioni
Kandidatët e interesuar për të marrë nënshtetësinë greke duhet të
dorëzojnë një “deklaratë natyralizimi” pranë bashkisë së vendbanimit të
tyre; një aplikim për natyralizim si dhe një leje qëndrimi.
Respektivisht kjo e fundit mund të jetë: leje qëndrimi afatgjatë ose
leje qëndrimi e brezit të dytë; leje për bashkëshortët/et e nënshtetasve
grekë ose të BE-së, ose një prind i një nënshtetasi grek në moshë të
mitur; leje për një refugjat politik ose me mbrojtje të përkohshme; si
dhe leje qëndrimi e dhënë si person pa nënshtetësi. Gjithashtu,
kandidatët duhet të dorëzojnë edhe pasaportën e tyre. Nëse individi ka
lindur jashtë vendit nevojitet një certifikatë lindjeje, e vërtetuar dhe
e përkthyer në greqisht, ndërsa nëse ka lindur në Greqi, i duhet të
paraqesë një certifikatë lindjeje greke. Është e domosdoshme që
aplikantët të dorëzojnë edhe auditimet e taksave personale për vitet e
fundit, numrin e sigurimeve shoqërore (?.?.?.?.) si dhe dokumente të
tjera që vërtetojnë lidhjet e mia me Greqinë dhe grekët. Emigrantët
shqiptarë në Greqi mund të bëjnë aplikimin për nënshtetësinë greke pranë
Drejtorisë së Gjendjes Civile të Administratës së Decentralizuar të
zonës ku jetojnë.
Tarifat
Të interesuarit për nënshtetësinë greke duhet të paguajnë 700 euro për
aplikimin për herë të pare dhe 200 euro për aplikimin për herë të dytë
dhe për të gjitha aplikimet vijuese. Ndërkohë personat e deklaruar si
refugjatë apo pa nënshtetësi do të paguajnë vetëm 100 euro për aplikimin
për herë të parë dhe për të gjitha aplikimet vijuese. Në projektligjin e
ri që është paraqitur në parlament taksa prej 700 eurosh, parashikohet
të ulet dhe të bëhet 550 euro. Pas aplikimit, kandidatët duhet të presin
rreth 1 vit për të marrë përgjigje nëse aplikimi i tyre është pranuar
apo jo.
Kontrolli online
Gjithë personat që kanë aplikuar për nënshtetësinë greke dhe duan të
pyesin se në ç’fazë ndodhet aplikimi i tyre, tashmë mund të telefonojnë
direkt në drejtorinë e nënshtetësisë të Ministrisë së Brendshme. Të
interesuarit mund të telefonojnë nga e hëna në të premte (me përjashtim
të pushimeve zyrtare), dhe nga ora 10:00 deri në orën 13:00, në numrin e
telefonit: (+30) 2131361919. Po ashtu ka dhe një mundësi tjetër. Të
interesuarit mund të klikojnë në faqen zyrtare të Ministrisë së
Brendshme greke, ku në fund djathtas te kutia rozë, me emrin “POREIA
KTISIS ITHAJENIAS – Ecuria e marrjes së nënshtetësisë) dhe të ndjekin
udhëzimet. Fillimisht ata duhet të klikojnë shërbimin ku e kanë dorëzuar
aplikimin në bazë të qarkut, më tej numrin e dosjes, emrin dhe mbiemrin
e tyre si dhe të shkruajnë simbolet e verifikimit në fund fare e pastaj
shtypin “ANAZITISI”.
Marrja e nënshtetësisë
Prej disa kohësh, Greqia ka lehtësuar procedurat për të gjithë
emigrantët shqiptarë që marrin nënshtetësinë greke. Tashmë procedura për
kryerjen e shkëputjes nga leja e qëndrimit, mund të kryhet
automatikisht. Në momentin që një emigrant shqiptar merr nënshtetësinë
greke, kjo paraqitet në gazetën qeveritare. Para funksiononte në këtë
mënyrë: emigranti duhej të shkonte në Qendrën e Emigracionit ku dhe
kishte marrë lejen e qëndrimit, dhe bënte shkëputjen nga kjo leje në
mënyrë që të merrte nënshtetësinë. Por kjo ishte një procedurë që
zgjaste 2-3 javë. Tashmë procedura është lehtësuar dhe bëhet
automatikisht. Megjithëse heqja e lejes së qëndrimit mund të duket një
veprim i thjeshtë, në fakt, njerëzve u kushtonte shumë, sidomos të
rinjve të brezit të dytë që mund të kishin shans për të shfrytëzuar
programe studimi jashtë shtetit, dhe nuk pajiseshin në kohën e duhur me
këtë dokumente greke. Kjo sepse nuk mund të paraqiteshin direkt në zyrat
e shtetasve të huaj dhe emigracionit, por duhej që më parë të linin një
takim, e cili mund të realizohej edhe pas disa muajsh.
Ndërkaq edhe mbajtësit e “kartës së homogjenit”, duhej të paraqiteshin
në polici për të anuluar kartën e tyre. Pra, gjithë kjo procedurë sillte
një zvarritje të panevojshme, në një kohë që gjithçka mund të zgjidhej
në mënyrë elektronike nga shërbimet administrative greke.
Kategoritë aplikuese për nënshtetësi greke
Kur mund të kryhet aplikimi:
Pas 7 viteve qëndrimi të përhershëm dhe të ligjshëm në Greqi.
Pas 3 viteve qëndrimi të përhershëm dhe të ligjshëm në Greqi me kusht që
të jem martuar me një nënshtetas/e grek/e dhe të kem fëmijë me të.
Pas 3 viteve qëndrimi të përhershëm dhe të ligjshëm nëse kam një fëmijë
në moshë të mitur që ka nënshtetësi greke (nuk aplikohet për ata që e
kanë fituar nënshtetësinë sepse kanë frekuentuar një shkollë greke).
Pas 3 viteve qëndrimi të përhershëm dhe të ligjshëm në Greqi, nëse jam
refugjat ose jam pranuar si person pa nënshtetësi nga autoritetet greke.
Dokumentacioni
Një “deklaratë natyralizimi” pranë bashkisë së vendbanimit.
†Një aplikim për natyralizim.
Një leje qëndrimi e llojeve të mëposhtme si:
Leje qëndrimi afatgjatë ose leje qëndrimi e brezit të dytë,
për bashkëshortët/et e nënshtetasve grekë ose të BE-së, ose një prind i një nënshtetasi grek në moshë të mitur,
një refugjat politik ose me mbrojtje të përkohshme,
si person pa nënshtetësi
Pasaporta.
Nëse keni lindur jashtë vendit, një certifikatë lindjeje, e vërtetuar
dhe e përkthyer në greqisht/ Nëse keni lindur në Greqi, një certifikatë
lindjeje greke.
Auditimet e taksave personale për vitet e fundit.
Numri i sigurimeve shoqërore (?.?.?.?.).
Dokumente të tjera që vërtetojnë lidhjet e mia me Greqinë dhe grekët.
Kush nuk ka të drejtë aplikimi
Ata që nuk kanë leje qëndrimi ose kanë vetëm leje të përkohshme.
Ata që kanë marrë dënime me burg që janë më shumë se 6 muaj, për lloje
të caktuara krimesh, ose dënime që janë më shumë se 1 vit për krime që
janë kryer me dashje. /GSH
