Nga Agim Xhafka
Ishim për bukuri në plazh deri nga ora dhjetë. Se më pas nga lokali matanë shezllonave vinin ca thirrje si histerizma.
-Ju kam mbajtur në pëllëmbë të dorës,more pizevengër! Ju kam dhënë punë e nga unë e keni edhe vërtetimin ,atë që u dha tokë. E sheh këtë hotel që ke ngritur. Mbi tokën e Vaitit e ke bërë. Nuk ia dhamë atij,e more ti. Se firma ime ty ta dha, pronarit na, dhe nxirrte bërrylin.
U bëmë kuriozë të gjithë të shihnim kush çirrej kështu.
-Ndonjë i dehur,-mendova.
Kur ia palli prapë:
-O Nimet,o Nimet!
-Urdhëro,Sami,-iu përgjigj një burrë,mbi biçikletë kishte një kosh me fiq që e shiste në plazh.
-Të kujtohet kur të kapa me lopën te jonxha? Të kujtohet që të fala? Dhe duhet të dish për nder se kush e di sa burg do bëje. Apo kur shave qeverinë se një mut u jepte vajguri për gatim? I harrove,more derr?!
Heshti pak sa gjerbi kafen e ia nisi prapë:
-Shtet bëmë ne, nuk guxoje të flisje e të bëje dër dër…Të gjithë në arë sa delte dielli e deri sa rrëzohej në det. Si ushtarë të bindur. Hahahaha, një, dy, një, dy…
Nuk m’u durua dhe pyeta të zotin e lokalit.
-Kush është ky mumja?
-Samiu, Samiu, ka qenë kryetar i kooperativës.
-Paska lajthitur. I ka mbushur 85?
-Aq duhet të jetë. Shumë vite heshti, bile nuk delte as nga shtëpia, kafshonte gjuhën kur e ngacmonin njerëzit.
-Pse e ngacmonin?
-Se as bukë misri nuk siguronin dot familjet në kohën e këtij. Qumështin në fshat fëmijët e shihnin veç në libra. Mishi u harrua si shije e si formë.
-Nxirre jashtë lokalit, po të bezdis turistët?
-Pu, pu, pu dhe kjo më duhet!- u tremb ai.
-Ke frikë nga ky gërxho?
-Po. Në fakt nga ky, por nga djemtë e tij.
-Janë nga të fortët?
-Më keq. Të zhdukin.
E ndërsa po hapja sytë i çuditur ai më afrohet te veshi.
-Një djalë e ka te tatimet. Vjen shpesh këtu me shokët. Ha, pi,nuk paguan vërtet, por shyqyr nuk më ve gjoba. Tjetrin e ka tek hipoteka. Dy kate m’i legalizoi., ama e pagova sa për një pallat. Tjetrin e ka në polici. Sa herë ngrihemi kur s’kemi drita ngre dorën ai e ku na ha e ku na djeg. Samiu është si benz i blinduar.
Ngela me gojë hapur. Ndërkohë Samiu m’u drejtua mua:
-Nga të kemi tyja, more?
Doja t’i thoja nga pçst, por u përmbajta.
-From Amerika, -iu përgjigja anglisht jo pa qëllim.
-Rama iu vjen hakut juve, ua dhjeu atë Trampin, ua vuri para hahahaha -foli dhe qeshte me zë të lartë.
-Ju po na dhisni prapë të gjithëve. Nuk u ngopët me komunizmin e parë. Filluat të dytin. -fola me vete dhe shkova e u kredha në det. Se më zhuriti inati ndaj monstrës së kuqe. E duke notuar më erdhën vetiu vargjet:
“Komunist t’u shoftë fara,
Ngado shkoj më del përpara…”
/syri.net/
