Një tragjedi e tmerrshme ka ndodhur në ishullin grek të Zakynthos, ku një pitbull ka sulmuar për vdekje Leon D., një djalë 2-vjeçar me origjinë shqiptaro-britanike. Sipas nënës së tij, Robbie Deeth, sulmi ndodhi brenda pak sekondash, ndërsa Leoni kishte shkuar ta përkëdhelte qenin, në kopshtin e tyre.
Robbie, e shokuar, tha se pitbulli nuk kishte dhënë shenja kurrë për probleme më parë dhe se sulmi mund të ketë ndodhur për shkak të gjuetarëve, që përdornin armë në pyllin pranë shtëpisë. Ajo shpjegoi se qeni ishte lidhur me zinxhir 10 metra dhe ishte nën kujdesin e familjes prej kohësh.
“Leoni ishte djali më i ëmbël që mund të imagjinoje, gjithmonë buzëqeshte dhe e donin të gjithë”, tha Robbie. Ajo kujtoi se djali i saj luante rregullisht me kafshët e shtëpisë dhe pitbulli kurrë nuk kishte qenë agresiv, raporton Daily Mail.
Sulmi ndodhi ndërsa prindërit po mbaronin blerjet, dhe brenda 30 sekondash djali u sulmua dhe u dërgua urgjentisht në spital, ku mjekët konfirmuan vdekjen e tij. Robbie tha se është e pamundur të përballojë humbjen e djalit të saj dhe se do të vazhdojë të kujtojë buzëqeshjen e tij të veçantë.
Policia vazhdon hetimet për ngjarjen e rëndë. Robbie mohoi raportimet se ata janë akuzuar për vrasje nga pakujdesia, duke theksuar se qeni ishte i ushqyer mirë dhe kurrë nuk kishte treguar agresivitet. Familja është shokuar nga shpejtësia e sulmit dhe ka bërë thirrje për kujdes dhe siguri për kafshët shtëpiake.
Ngjarja ka tronditur komunitetin lokal dhe u bë viral në rrjetet sociale, ku familja ndan foto të Leonit, duke luajtur me kafshët dhe duke festuar ditëlindjen e tij të dytë.
Në këtë moment tragjik, familja kërkon drejtësi dhe një hetim të plotë mbi rrethanat që çuan në humbjen e jetës së vogëlushit.