Pas ditëve me reshje dhe temperatura të ulëta, fundjava do të sjellë një ndryshim të dukshëm në mot. Sipas parashikimeve, kushtet atmosferike do të përmirësohen ndjeshëm që nga e enjtja, duke sjellë mot më të qëndrueshëm dhe temperatura në rritje në të gjithë territorin.
Nga e premta dhe gjatë fundjavës, priten ditë me diell dhe vranësira kalimtare, kryesisht në zonat veriore dhe verilindore. Termometrat do të ngjiten deri në 27°C në disa qytete të Shqipërisë së jugut, ndërsa në zonat malore temperaturat e mëngjesit do të zbresin pranë zeros transmeton shqiptarinet.
Era do të mbetet mesatare, me periudha kur forcohet në zonat bregdetare dhe malore, por pa krijuar shqetësime serioze. Deti do të jetë i qetë, çka e bën fundjavën ideale për lëvizje apo udhëtime drejt bregdetit.
Në fillim të javës tjetër, pritet që moti i ngrohtë dhe i kthjellët të vazhdojë, ndërsa temperaturat do të mbeten më të larta se mesatarja e muajit tetor. Sinoptikanët paralajmërojnë se nga mesi i muajit mund të rikthehen stuhitë ciklonare nga Mesdheu, të cilat mund të sjellin reshje më intensive dhe një ulje graduale të temperaturave.
Në përgjithësi, këto ditë do të karakterizohen nga mot i qëndrueshëm dhe i përshtatshëm për aktivitete në natyrë, pas një periudhe të ftohtë dhe me reshje. Shqipëria, për disa ditë, do të gëzojë një fundjavë tipike vjeshte me diell, dritë dhe ajër të pastër.