Ambasada e Shteteve të Bashkuara të Amerikës në Tiranë ka njoftuar se, pavarësisht dhënies së vizave për të udhëtuar në SHBA, kontrolli i vazhdueshëm do të jetë i nevojshëm për të garantuar sigurinë dhe integritetin.
Në një njoftim të shpërndarë për mediat, Ambasada e SHBA-së thekson se: “Departamenti i Shteteve të Bashkuara është i përkushtuar të bëjë Amerikën më të sigurt përmes politikave më kërkuese.”
Ambasada ka nënvizuar se një masë thelbësore për këtë proces është kontrolli i vazhdueshëm i vizave për të gjithë individët. “Kontrolli i vizave amerikane nuk ndalon pas lëshimit të vizës. Ne monitorojmë vazhdimisht mbajtësit e vizave për t’u siguruar që ata ndjekin të gjitha ligjet dhe rregullat e emigracionit të SHBA-së. Në rast se ata nuk përmbushin këto kushte, do t’ua heqim vizat dhe do t’i dëbojmë nga territori amerikan,” – ka deklaruar Ambasada.